केज / प्रतिनिधी : -केज येथे मराठवाडा साहित्य परिषद आणि ज्येष्ठ नागरिक संघ यांच्या वतीने दिवाळी पहाट कार्यक्रमाचे आयोजन शेतकरी कामगार पक्षाच्या मीटिंग हॉलमध्ये करण्यात आले होते. साहित्य, काव्य आणि संगीताच्या सुरेल संगमातून हा दिवाळी पहाट कार्यक्रम उत्साहपूर्ण वातावरणात संपन्न झाला.
या कार्यक्रमासाठी शेतकरी कामगार पक्षाचे भाई मोहन गुंड, प्रा. हनुमंत भोसले, प्रा. हनुमंत सौदागर, प्रतिष्ठित व्यापारी जाजू काका, गदळे सर यांच्यासह मराठवाडा साहित्य परिषदेचे पदाधिकारी, सदस्य तसेच केज शहरातील ज्येष्ठ नागरिक संघाचे सदस्य मोठ्या संख्येने उपस्थित होते.दिवाळीच्या मंगलमय वातावरणात अनेक कवी, साहित्यिक आणि साहित्यप्रेमींनी आपल्या स्वरचित कविता, विविध साहित्यकृती आणि सुमधुर गीतांच्या माध्यमातून आनंदोत्सव साजरा केला.
कवितांमधून सामाजिक, सांस्कृतिक आणि मानवी जीवनातील विविध पैलूंना स्पर्श करण्यात आला, तर गीतांच्या सादरीकरणाने कार्यक्रमात उत्साहाची रंगत आणली.ज्येष्ठ नागरिकांना एकत्र आणून त्यांच्या कलागुणांना व्यासपीठ उपलब्ध करून देणारा हा उपक्रम विशेष ठरला. साहित्य आणि संगीताच्या माध्यमातून दिवाळीचा आनंद एकमेकांसोबत वाटून घेत उपस्थितांनी या कार्यक्रमाचा मनमुराद आनंद लुटला.
अशा साहित्यिक आणि सांस्कृतिक उपक्रमांमुळे केज शहरातील साहित्यिक वातावरण अधिक समृद्ध होण्यास मदत होत असून दिवाळी पहाट कार्यक्रमाने उपस्थितांच्या आठवणींमध्ये आनंदाचे क्षण निर्माण केले.
