केज/प्रतिनिधी
ग्रामपंचायत कार्यालय चिंचोलीमाळी येथे ग्रामपंचायत अधिकारी म्हणून कार्यरत असलेल्या महिला अधिकाऱ्याच्या शासकीय कामात अडथळा आणून धमकी दिल्याप्रकरणी गुलाब बाबूखा पठाण रा.चिंचोलीमाळी,ता. केज यांच्याविरुद्ध केज पोलीस ठाण्यात असंज्ञेय (NCR) गुन्हा दाखल करण्यात आला आहे.
मिळालेल्या माहितीनुसार,दि.४ सप्टेंबर २०२६ रोजी केज पोलीस ठाण्यात अंबाजोगाई येथील रहिवासी व चिंचोली माळी ग्रामपंचायतीच्या अधिकारी अनिता सखाराम जाधव यांनी तक्रार नोंदवली आहे. दि.१९ ऑगस्ट २०२६ रोजी सकाळी त्या ग्रामपंचायत कार्यालयात दैनंदिन कामकाज करत असताना,आरोपी गुलाब पठाण याने सभागृहाच्या ताबा पावतीची मागणी केली.
यावर सरपंचांची सही व वरिष्ठ अधिकाऱ्यांची मंजुरी असल्याशिवाय ताबा पावती देता येत नाही, असे सांगितले असता आरोपीने हुज्जतघालून कामात अडथळा निर्माण केला व धमकी दिली.
याप्रकरणी अनिता जाधव यांच्या तक्रारीवरून केज पोलीस ठाण्यात भारतीय न्याय संहिता (B.N.S.S.)च्या कलम २२४ अन्वये अदखल पात्र गुन्हा (NCR No. ०८८०/२०२६) नोंदवण्यात आला आहे.या प्रकरणाचा पुढील तपास पोलीस निरीक्षक राहुल कामाजी सूर्यतळ यांच्या मार्गदर्शना खाली सुरू आहे.
