डिजिटल बीड प्रतिनिधी
बीडच्या केज तालुक्यात रानडुकरांचा धुमाकूळ; शेतात गेलेल्या शेतकऱ्यांवर जीवघेणा हल्ला.
बीड: जिल्हयातील केज तालुक्यातील शिंदी आणि गप्पेवाडी परिसरात रानडुकरांनी उच्छाद मांडला आहे. आज सकाळी शेतात कामासाठी गेलेल्या ५ शेतकऱ्यांवर रानडुकरांच्या कळपाने अचानक भीषण हल्ला केला. या हल्ल्यात शेतकरी गंभीर जखमी झाले असून त्यांच्यावर सध्या रुग्णालयात उपचार सुरू आहेत.
मिळालेल्या माहितीनुसार, शेतकरी नेहमीप्रमाणे शेतात कृषी काम करत असताना अचानक रानडुकरांच्या मोठ्या कळपाने त्यांच्यावर हल्ला चढवला. अचानक झालेल्या या भीषण हल्ल्यात अनेक शेतकरी गंभीर जखमी झाले असून काहींची प्रकृती चिंताजनक असल्याचे सांगितले जात आहे. जखमींच्या किंकाळ्यांनी परिसर दणाणून गेला आणि ग्रामस्थांनी घटनास्थळी धाव घेत जखमींना तातडीने बाहेर काढले.
स्थानिक नागरिकांनी वेळेवर मदत करत जखमींना बीड, अंबाजोगाई, केज आणि विडा येथील विविध रुग्णालयांत उपचारासाठी दाखल केले. यातील एका शेतकऱ्याची प्रकृती अत्यंत गंभीर असल्याने नातेवाईकांमध्ये चिंतेचे वातावरण आहे.घटनेनंतर संतप्त ग्रामस्थांनी प्रशासनाकडे रानडुकरांचा तातडीने बंदोबस्त करण्याची मागणी केली.
वाढता दबाव आणि ग्रामस्थांचा संताप लक्षात घेता वनविभागाने तातडीने रेस्क्यू ऑपरेशन राबवत संबंधित रानडुक्कराला पकडून ताब्यात घेतल्याची माहिती समोर आली आहे.तरीही वारंवार होत असलेल्या रानडुकरांच्या हल्ल्यांमुळे केज तालुक्यातील शेतकरी दहशतीखाली जीवन जगत आहेत.
सतत होणाऱ्या वन्यप्राण्यांच्या हल्ल्यामुळे आता शेतात जायचे कसे? असा प्रश्न शेतकऱ्यांसमोर उभा ठाकला आहे.
जखमी शेतकऱ्यांना तातडीने आर्थिक मदत द्यावी तसेच भविष्यात अशा घटना टाळण्यासाठी कायमस्वरूपी उपाययोजना कराव्यात, अशी मागणी ग्रामस्थांकडून करण्यात येत आहे.
आता प्रशासन आणि वनविभाग यापुढे कोणती ठोस पावले उचलणार याकडे संपूर्ण जिल्ह्याचे लक्ष लागले आहे.
